२५ मंसिर, सप्तरी । सप्तरीका प्रतिनिधिसभा तर्फका ४ र प्रदेशसभाका ८ गरी सबै १२ वटा क्षेत्रको अन्तिम नतिजा सार्वजनिक भएको छ । सप्तरीको ४ प्रतिनिधिसभा क्षेत्रमध्ये ३ वटामा मधेसी गठबन्धन विजयी भएको छ । एक क्षेत्रमा कांग्रेसले जीत हात पारेको छ ।
क्षेत्र नम्बर १, २ र ३ मा मधेशी गठबन्धनका उम्मेदवार निर्वाचित भएका छन् । क्षेत्र नम्बर १ मा संघीय समाजवादी फोरम नेपालका डा. सुर्यनारायण यादव, २ मा संघीय समाजवादी फोरम नेपालका अध्यक्ष उपेन्द्र यादव र क्षेत्र नम्बर ३ मा राजपाका उम्मेदवार चन्द्रकान्त चौधरी निर्वाचित भएका छन् ।
डा. यादव २१ हजार ७ सय १२ मत प्राप्त गरी निर्वाचित भए । उनका निकटतम प्रतिद्वन्द्वी बाम गठबन्धनका उम्मेदवार अशोक मण्डलले १८ हजार २ सय २५ मत प्राप्त गरे । यहाँ तेस्रो स्थानमा कांग्रेस रह्यो । कांग्रेसका उम्मेदबार रामदेव साहले १५ हजार २ सय २५ मत प्राप्त गरे ।
क्षेत्र नम्बर ३ मा राजपाका चौधरीले २२ हजार ५ सय ८४ मत प्राप्त गरी विजयी भएका छन् । उनका निकटतम प्रतिद्वन्द्वी नेपाली कांग्रेसका दिनेश यादवले १९ हजार ४ सय १ मत प्राप्त गरे ।
क्षेत्र नम्बर २ बाट संघीय समाजवादी फोरम नेपालका अध्यक्ष उपेन्द्र यादव निर्वाचित भएका छन् । यादवले २१ हजार ६२० मत ल्याई विजयी भए भने उनका निकटतम प्रतिद्वन्द्वी वाम गठबन्धनका उमेश यादवलेे ११ हजार ५८० मत पाएका छन् । स्वतन्त्र उम्मेदवारी दिएका जयप्रकाश ठाकुरले भने ९ हजार ४ सय ५८ मत प्राप्त गरे ।
प्रतिनिधिसभा क्षेत्र नम्बर ४ मा भने कांग्रेस विजयी भएको छ । कांग्रेसका उम्मेदवार तेजुलाल चौधरी दोस्रो पटक निर्वाचित भएका हुन् । यसअघि उनी ०७० सालको दोस्रो संविधानसभाको निर्वाचनमा कांग्रेसबाटै विजयी भएका उनी यस पटक पुनः विजयी भएका हुन् ।
चौधरी २४ हजार १ सय १३ मत ल्याएर विजयी भए । उनका निकटतम प्रतिद्वन्द्वी राजपाका मृगेन्द्रकुमार सिंह यादवले १४ हजार ८ सय ८६ मत ल्याए ।
