काठमाडौं । विपक्षी गठबन्धनले सर्वोच्च अदालतको फैसलाअनुसार मंगलबारदेखि नै नयाँ सरकार गठनको प्रक्रिया थाल्ने भएको छ । एमाले नेता माधवकुमार नेपाल निवास कोटेश्वरमा बसेको गठबन्धनको बैठकले उक्त निर्णय गरेको हो ।
बैठकपछि सञ्चारकर्मीलाई प्रतिक्रिया दिँदै जनता समाजवादी पार्टीका नेता डा. बाबुराम भट्टराईले अब शेरबहादुर देउवा नेतृत्वमा सरकार बनाउन प्रक्रिया थाल्ने निर्णय गरेको जानकारी दिए ।
‘यो गठबन्धकै सरकार हुनेछ, त्यसलाई कसरी बढी प्रभावकारी र नयाँ ढंगले लिएर जाने र जनताका समस्यालाई कसरी समाधान गर्न सकिन्छ भनेर तयारी गरेर अघि बढ्ने निर्णय गरिएको छ,’ उनले भने ।
भट्टराईले राष्ट्रिय एकता कायमका लागि प्रयत्न गर्ने पनि बताए । सरकारमा माधवकुमार नेपाल सहभागी हुने या नहुने भन्नेबारे कुनै खुलाइएको छैन ।
