काठमाडौँ | मधेश आन्दोलनका मागहरु पुरा नभए संसद छोडेर आन्दोलनमा जाने चेतावनी राष्ट्रिय जनता पार्टी नेपालले दिएको छ | व्यवस्थापिका संसद्को आइतबारको बैठकमा राजपाकी संसदबाट डा.डिम्पल कुमारी झाले संसद छोडेर आन्दोलनमा जाने चेतावनी दिएकी छिन् |
संसद्को विशेष समयमा बोल्दै सांसद झाले संविधान संशोधन प्रस्ताव अघि नबढाए संसद् नै छोडेर जाने चेतावनी दिइन्।
‘तत्काल संविधान संशोधन विधेयक संसद्माग अघि बढाइयोस् र सहमति र सहकार्यका आधारमा त्यसलाई पारित गरियोस्,’ झाले भनिन्, ‘अन्यथा हाम्रो राष्ट्रिय जनता पार्टी संसद नै छोडेर जनतामा जान बाध्य हुनेछ।’
उनले निर्वाचन चाँडै होस् भन्ने आफ्नो पार्टी र मधेसी जनताको पनि चाहना भएको भन्दै प्रमुख दलले जनताको माग सम्बोधन गर्ने भन्दा पनि चुनाव सार्ने काम गरेको बताइन्।
‘न त हाम्रो पार्टीको माग चुनाव सार्ने छ, न त मधेसी जनताको नै त्यस्तो चाहना छ,’ उनले भनिन्, ‘पटक पटक सम्झौता गर्ने तर मधेसी जनताको अधिकार दिलाउने काम नगर्ने गरेर यहाँका दलहरुले मधेसी जनतालाई ठगी रहेका छन्।’
हुलाकी न्युज
