सप्तरी । आज ५५ जना नयाँ सङ्क्रमित थप सँगे प्रदेश नं २ मा कोरोना सङ्क्रमितको सङ्ख्या २३३ पुगेको छ । यस प्रदेशमा आइतबारसम्ममा १७८ जना सङ्क्रमित रहेका थिए ।
स्वास्थ्य तथा जनसङ्ख्या मन्त्रालयद्वारा आज बिहान जारी प्रेस विज्ञप्तिमा थप ७२ जनामा कोरोना सङ्क्रमित पुष्टि भएको उल्लेख छ । यस प्रदेशका चार जिल्ला रौतहट, बारा, सप्तरी र धनुषामा गरी ५४ जना नयाँ सङ्क्रमित समावेश छ ।
सोमध्ये रौतहटको राजपुर फरहदवाको २, ६, ८ र ९ वडाका साथै इशनाथपुर–२का गरी १८ देखि ५३ वर्ष उमेरका २६ जना नयाँ सङ्क्रमित छन् । उहाँहरुको स्वाबको नमूनाको परीक्षण राष्ट्रिय जनस्वास्थ्य प्रयोगशालामा भएको थियो । रौतहटमा कोरोना सङ्क्रमितको सङ्ख्या ४९ पुगेको छ ।
बाराको कलैया नगरपालिका–१को कोटवासीका २५ र ३२ वर्षका दुईजना थपिएका छन् । उहाँहरुको पनि टेकुस्थित प्रयोगशालामा स्वाब परीक्षण भएको थियो । यसका साथै किटजन्य रोग अनुसन्धान तथा तालिमकेन्द्र, हेटौँडामा गरिएको परीक्षणमा बाराका गढीमाई नगरपालिकाका १८ वर्षदेखि ५० वर्ष उमेरका २१ जनामा सङ्क्रमण पुष्टि भएको छ । यी दुवै नगरपालिकाका २३ जनासमेत गरी यस जिल्लामा सङ्क्रमितको सङ्ख्या ३६ पुगेको छ ।
धनुषाको नगराइन नगरपालिकाका ३०, ३१ र ४५ वर्षका तीनजना गरी अब धनुषामा कोरोना सङ्क्रमितको सङ्ख्या ११ पुगेको छ । उहाँहरुको स्वाबको परीक्षण टेकुस्थित प्रयोगशालामा भएको थियो । यसका साथै, सप्तरीको डाक्नेश्वरी गाउँपालिकाका २२ र २४ वर्षका दुईजना थपिएको हो ।
दुवैको स्वाबको परीक्षण बिपी कोइराला स्वास्थ्य विज्ञान प्रतिष्ठान, धरानमा भएको थियो । सप्तरीमा सङ्क्रमितको सङ्ख्या चार पुगेको छ । त्यस्तै सिरहामा एक, महोत्तरीमा चार, सर्लाहीमा ३४ र पर्सामा ९३ जना सङ्क्रमित रहेका छन् ।
नेपालमा कोरोनाभाइरसबाट संक्रमित हुनेको संख्या ६८२ पुगेको छ । अछामका ३२ वर्षीय पुरुष, बर्दियाका २२ र २४, १८ वर्षीय पुरुषमा तथा पर्साका १८ वर्षीय र काठमाडौं घर भइ बाराको कलैयामा कार्यरत पुरुषमा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जानकारी दिएको छ ।
