काठमाण्डौ।आज एकैदिनमा एक सय ७० जना कोरोनाका नयाँ सङ्क्रमित बिरामी थपिएका छन् ।
विभिन्न प्रयोगशालामा गरिएको परीक्षणमा एक सय ६५ जना पुरुष र पाँच जना महिलामा कोरोना पुष्टि भएको स्वास्थ्य तथा जनसङ्ख्या मन्त्रालयले जनाएको छ । आज सङ्क्रमण पुष्टि भएकामध्ये सबैभन्दा धेरै रौतहटका रहेका छन् । आज रौतहटका ५६ जनामा कोरोना पुष्टि भएको हो ।
त्यस्तै कपिलवस्तुका ५१, झापाका २८, बाँकेका १०, पर्साका पाँच, सर्हालीका पाँच, सप्तरीका चार, बाराका चार, दाङका दुई, रुपन्देहीका एक र म्याग्दीका एक जनामा कोरोना सङ्क्रमण पुष्टि भएको हो ।
आज एक सय ७० जना थपिएसँगै नेपालमा सङ्क्रमितको सङ्ख्या एक हजार दुई सय १२ पुगेको छ । सङ्क्रमितमध्ये दुई सय ६ जना निको भएका छन् भने ज्यान गुमाउनेको सङ्ख्या ६ पुगेको मन्त्रालयले जनाएको छ ।
