सप्तरी । पछिल्लो २४ घण्टामा अहिलेसम्मकै सर्वाधिक धेरै कोरोना संक्रमित भेटिएका छन् । देशभरका विभिन्न प्रयोगशालाबाट आएको रिपोेर्ट अनुसार थप ४४८ जनामा कोरोना पुष्टि भएको छ।
शुक्रबार स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्रा।डा। जागेश्वर गौतमले ४२४ पुरुष र २४ महिला गरी थप ४४८ जनामा कोरोना पुष्टि भएको बताए।
एकैदिन परीक्षण गर्दा देखिएका संक्रमितमध्येको उच्च संख्या हो भने योसँगै नेपालमा कोरोना संक्रमितको संख्या ५०६२ पुगेको छ।
संक्रमितमध्ये ४७०९ जना पुरुष र ३५३ जना महिला रहेको मन्त्रालयले जनाएको छ।
पछिल्लो २४ घण्टामा नेपालमा थप १६ जना उपचारपछि निको भएर घर फर्केका छन् भने योसँगै निको भएर घर फर्कनेको संख्या ८७७ पुगेको छ। जसमा ७८६ पुरुष र ९१ जना महिला रहेको मन्त्रालयले जनाएको छ।
