राजविराज। आइतबार साँझ करिब ५ः३० बजे मृत्यु भएकी सप्तरीकी कोरोना संक्रमित महिलाको शव १९ घण्टा बित्दा समेत अझै उठ्न सकेको छैन । आइसोलेसनको खुल्ला प्राङ्गणमा शवलाई राखिएको छ । खुल्ला ठाउँमा राखिएका कारण रातभरको अविरल वर्षाले शव भिज्न पुगेको मृतकका आफन्तले बताएका छन् ।
बिष्णुपुर गाउँपालिका वडा नम्बर ३ निवासी ६२ वर्षीया महिलाको राजविराजस्थित साइकृष्णा आइसोलेसन केन्द्रमा आइतबार साँझ मृत्यु भएको थियो ।
स्वास्थ्यमा समस्या देखिएपछि महिलालाई असोज २ गते राजविराज स्थित गजेन्द्रनारायण सिंह अस्पतालको इमर्जेन्सी वार्डमा भर्ना गरिएको थियो।
अस्पतालले उनलाई निमानियाँ भएको आशंकमा प्रिआईसोलेसनमा राखि उपचार सुरु गरेको थियो । असोज ३ गते स्वाव संकलन गरी परिक्षण गर्दा ४ गते कोरोना संक्रमण पुष्टि भएको अस्पतालका निमित्त मेडिकल सुपरिटेन्डेन्ट रणजीतकुमार झाले जानकारी दिए ।
मृतक महिलाको शव बाहिर राखेको र तत्कालै व्यवस्थापन नगर्दा पानीमा भिजिरहेको छ । यहाँ आइतबार रातदेखि नै वर्षा भइरहेको छ ।
शव खाना खानो ठाउँ नजिकै राखिएका कारण आइसोलेसनमा भर्ना भएका अधिकांश कोरोना संक्रमितले खाना समेत नखाएको आइसोलेसनमा बसेका संक्रमितहरुले बताएका छन् । एक संक्रमितका अनुसार खाना खाने ठाउँदेखि २० मिटरको दूरीमा शव राखिएका कारण रातिदेखि नै धेरै मान्छेले खाना खाएका छैनन् ।
खाना खाए स्थल नजिकै संक्रमितको शवलाई राखेपछि संक्रमितहरुले अहिले आइसोलेसन केन्द्रमा नाराबाजी गरिरहेका छन् ।
प्रमुख जिल्ला अधिकारी शंकरहरि आचार्यले स्थानीय पालिका प्रमुखले ध्यान नदिएका कारण शव व्यवस्थापनमा ढिलो भएको स्वीकारे ।
