काठमाडौं । बलिउड अभिनेता सलमान खान आफ्नो छिमेकीसँग रिसाएका छन् । यो मुद्दा बम्बे हाईकोर्टमा पुगेको छ । शुक्रबार मुद्दाको सुनुवाइको क्रममा सलमान खानको तर्फबाट पनवेल फार्महाउसका उनका छिमेकी केतन कक्कडको सामाजिक सञ्जाल पोस्टहरू अपमानजनक मात्र नभएर समुदायलाई उक्साउने पनि भएको बताइएको थियो।
न्यायाधीश सीवी भराङले सलमान खानको निवेदनको सुनुवाइ गरेका थिए । यो अपील सलमानले मार्च २०२२ मा सिभिल कोर्टको आदेशलाई चुनौती दिँदै दायर गरेका थिए। अदालतले कक्कडलाई सलमान खानले दायर गरेको मानहानीको मुद्दामा राहत दिन अस्वीकार गरेको थियो । सलमानले कक्कड विरुद्ध सामाजिक सञ्जालमा अपलोड गरेको भिडियोलाई लिएर मुद्दा दायर गरेका थिए जसमा कक्डले सलमानले आफ्नो पनवेल फार्महाउसमा के गर्छन भनेर देखाएका थिए ।
सलमान खानले केतन कक्कडलाई यो भिडियो हटाउन आदेश दिन अदालतलाई अनुरोध गरेका थिए । साथै, उनलाई भविष्यमा अभिनेताको बारेमा टिप्पणी गर्नबाट रोक्नु पर्ने पनि माग गरिएको छ। सिभिल कोर्टले यस्तो आदेश दिन अस्वीकार गरेपछि सलमान उच्च अदालत पुगेका थिए ।
शुक्रबार सलमान खानका वकिल रवि कदमले सिभिल कोर्टले आदेश नदिनु गलत भएको बताए । उनले भने, ‘कक्कडले अपलोड गरेका भिडियोहरू विशुद्ध अनुमान हुन्। ती भिडियोहरू मानहानि मात्र होइन, दर्शकहरूलाई सलमान खानविरुद्ध साम्प्रदायिक रूपमा उक्साउने पनि हुन्।
भिडियोको स्क्रिप्ट पढ्दै रवि कदमले भने कि कक्कडले अल्पसंख्यक समुदायका सलमान खानलाई उनको पनवेल फार्महाउस नजिकै रहेको भगवान गणेशको मन्दिर कब्जा गर्न चाहेको बताएका छन् । कदमले भने, ‘भिडियोमा कक्कडले सलमान खानलाई बाबर र औरंगजेबसँग तुलना गरेका छन् । उनले अयोध्या मन्दिर बनाउन ५०० वर्ष लाग्यो र सलमान खान यहाँको गणेश मन्दिर बन्द गराउन चाहन्छन् भनेका छन् ।’
उनले थप भने, ‘यी भिडियोलाई लाखौं दर्शकले हेरेका छन् । यी प्रयोगकर्ताहरूले भिडियोमा सलमान खानको विरुद्धमा पनि टिप्पणी गरेका छन् । यस्तो अवस्थामा यी भिडियोहरूले दर्शकलाई सलमान खानविरुद्ध स्पष्ट रूपमा उक्साएको छ । भिडियोले सबै कुरालाई साम्प्रदायिक बनाएको छ र सबै कुरालाई हिन्दू बनाम मुस्लिम बनाएको छ।’
रवि कदमले भने कक्कडले सलमान खानलाई अन्डरवर्ल्ड डन दाउद इब्राहिमको गिरोहको सदस्य भएको आरोप लगाएका छन् । उनी भन्छन्, ‘सलमानले आफ्नो फार्महाउसबाट लागुऔषध तस्करी, अंग तस्करी र बालबालिकाको तस्करीको व्यवसाय गरिरहेको कक्कडले आरोप लगाएका छन्।’
यो सुनुवाइपछि अदालतले अगस्ट २२ को मिति तोकेको छ । केतन कक्कडका वकिल आभा सिंह र आदित्य सिंहले ट्रायल कोर्टमा सलमान खानले आफ्नो जग्गा हडप्नका लागि आफूविरुद्ध मानहानीको मुद्दा दायर गरेको दाबी गरेका थिए ।
