भूपदेव माली
२१ जेठ २१ गते ,सप्तरी।
सप्तरीको तिलाठी कोईलाडी गाउँपालिका अन्तर्गत विभिन्न शिर्षकको विज्ञापनमा भ्रष्टाचार गरेको भन्दै विभिन्न व्यक्ति तथा एजेन्सी विरुद्ध अख्तियार दुरुपयोग अनुसन्धान आयोगले विशेष अदालतमा मंगलबार मुद्दा दायर गरेको छ।
विभिन्न निर्माणको ठेक्काको विज्ञापन प्रकाशनका सम्बन्धमा अनियमितता गरेको अभियोगमा तत्कालीन प्रमुख प्रशासकीय अधिकृत सहित विभिन्न विज्ञापन एजेन्सीका सञ्चालक विरुद्ध अख्तियारले विशेष अदालतमा मुद्दा दायर गरेको हो ।
अख्तियार दुरुपयोग अनुसन्धान आयोगले गाउँपालिकका तत्कालीन प्रमुख प्रशासकीय अधिकृत सुरेन्द्र कुमार यादव, सहलेखापाल शत्रोहन दास, डच मिडियाका निर्देशक रवि अर्याल, प्रभाव दैनिकका कृष्ण बहादुर कार्की सहित ५ जना विरुद्ध तीन लाख १६ हजार चार सय बराबरको बिगो माग दाबी गरेर मुद्दा दायर गरेका छन्।
गाउँपालिकको आर्थिक वर्ष २०७९/०८० मा विभिन्न चार वटा बोलपत्रको आह्वान र खरिद आशयको सूचना सार्वजनिक खरिद ऐन अनुसार राष्ट्रिय स्तरको दैनिक पत्रिकामा प्रकाशन गर्नुपर्ने थियो । बोलपत्र आह्वानको सूचना लुकाउने उद्देश्यका साथ सार्वजनिक रुपमा प्रकाशन नगरी बोलपत्र स्वीकृत गर्ने आशयको सूचना एकप्रति मात्रै प्रकाशित गरेको पाइएको आयोगको आरोप छ ।
आयोगका अनुसार प्रेस काउन्सिल नेपालले २०७९ चैत २३ गतेको पत्र अनुसार उक्त बोलपत्रको सूचना प्रकाशित नभएको पाइएको छ । खरिद आशयको सूचना सार्वजनिक तवरमा वितरण प्रयोजनार्थ प्रकाशित नै नभएको देखिएको छ ।
पत्रिका व्यवस्थापन प्रणालीको पिडिएफ अभिलेखमा समेत कुनै सूचना प्रकाशित भएको नदेखिएको आयोगको ठहर छ । बोलपत्र आह्वानको सूचना सौर्य दैनिकमा एक–एक प्रति मात्रै प्रकाशन गरे गराएको, प्रेस काउन्सिलमा बुझाइएको विवरणमा समेत उल्लेख नभएको, पिडिएफमा समेत नभेटिएको आयोगको आरोप छ ।
विज्ञापनको सूचना लुकाउने उद्देश्यले सार्वजनिक तवरमा वितरण नगर्ने गरी एक–एक प्रति प्रकाशित गरी बदनियत राखेको पाइएको आयोगको ठहर छ । आयोगका प्रवक्ता राजेन्द्रकुमार पौडेलको अनुसार तत्कालीन प्रमुख प्रशासकीय अधिकृत यादवसहित पाँच जनाविरुद्ध कैद र बिगो असुल उपरको माग दाबीका साथ विशेष अदालतमा मुद्दा दायर गरिएको छ।
