काठमाडौँ । उपचारका क्रममा निधन भएका नेपाली काँग्रेसका केन्द्रीय सदस्य तथा पूर्वमन्त्री खुमबहादुर खड्काको आज अन्तिम संस्कार गरिएको छ ।
उनको पार्थिव शरीरलाई आज बिहान खड्का निवास सानेपामा राखिएको थियो ।
बेलायतमा उच्च शिक्षा अध्ययनरत छोरा अनुराग खड्का काठमाडौँ आएपछि खड्काको शव अन्तिम श्रद्धाञ्जलीका लागि पार्टी कार्यालय सानेपा लगिएको थियो ।
नेपाली काँग्रेसका सभापति प्रधानमन्त्री शेरबहादुर देउवाले पार्टी नेता खड्काको पार्थिव शरीरमा पार्टीको झण्डा ओडेर सम्मान व्यक्त गरेका थिए ।
नेता खड्काको उपचारका क्रममा शुक्रबार साँझ भारतको नयाँ दिल्लीस्थित एपोलो अस्पतालमा ६७ वर्षको उमेरमा निधन भएको थियो । उनी मिर्गौला र छातीको संक्रमणबाट पीडित थिए ।
सभापति देउवाले नेता खड्का मुलुकको सपूत भएको पनि स्मरण गराउँदै दिवंगत नेता खड्काको शोकाकुल परिवारजनप्रति समवेदना समेत व्यक्त गरेका थिए ।
