न्युज 1नेपाल
जेष्ठ १७ गते,काठमाडौँ —राजावादीको आन्दोलनमा ड्युटीमा खटिएका प्रहरीसँग अभद्र व्यवहार गर्ने एक राप्रापाका कार्यकर्तालाई प्रहरीले पक्राउ गरेका छन ।
पक्राउ पर्ने धनगढी नगरपालिका-१४, सिरहका ने बहादुर खड्कालाई प्रहरीले परिसर भद्रकालीमा लगिएका हुन् ।
थप विवाद बढ्न नदिन तत्काल खड्कालाई नियन्त्रणमा लिएको जिल्ला प्रहरी परिसर काठमाडौंका सूचना अधिकारी प्रहरी उपरीक्षक अपिलराज बोहराले जानकारी दिए ।
नारायणहिटी परिसरलाई निषेधित क्षेत्र तोकिएपछि राजावादीहरू शान्तिवाटिकामा भेला भएर प्रधानमन्त्री निवास बालुवाटारतर्फ अघि बढ्दै गएका थिए। राप्रपालगायत दल र राजावादी समूहले राजसंस्था पुनः स्थापना र हिन्दु राष्ट्रको मागसहित १५ गतेदेखि काठमाडौँबाट सुरु गरेको अनिश्चितकालीन प्रदर्शन जारी रहेको हुँदा छ निर्धारित कार्यक्रम अनुसार उनीहरुले शनिबार दरबारमार्ग क्षेत्रमा प्रदर्शन गर्ने जनाएका थिए । तर, जिल्ला प्रशासन कार्यालय काठमाडौंले शनिबारदेखि नै लागू हुने गरी २४ असारसम्म नारायणहिटी दरबार संग्रहालय क्षेत्रलाई निषेधित क्षेत्र तोकेपछि उनीहरूले कार्यक्रमस्थल परिवर्तन गरेका थिए ।
नवराज सुवेदी नेतृत्वमा रहेको संयुक्त जनआन्दोलन परिचालन समितिले यो आन्दोलनको नेतृत्व गरिरहेको छ । संयोजक सुवेदीले जनप्रदर्शन निरन्तर चल्ने बताएका छन् । ‘राजतन्त्रसहित हिन्दु राष्ट्र कायम हुन्छ,’ सुवेदीले भने, ‘हाम्रो माग पूरा नहुँदासम्म अखण्ड रूपमा यो संघर्ष कायम रहन्छ ।’
राजावादीले गत चैत १५ मा गरेको प्रदर्शन हिंसात्मक हुँदा सञ्चारकर्मी सुरेश रजक र कीर्तिपुर–४ का २९ वर्षीय सबिन महर्जनको मृत्यु भएको थियो । गोली लागेर २० जना घाइते भएका थिए । घाइते तीनजना अहिले पनि उपचार क्रममा छन् । सो घटनामा राप्रपाका वरिष्ठ उपाध्यक्ष रवीन्द्र मिश्र र महामन्त्री एवं सांसद धवलशमशेर जबरा, दुर्गाप्रसाद प्रसाईंसहित ६५ जनाविरुद्ध अदालतमा मुद्दा दर्ता भएको छ । त्यसमध्ये ४ जना बालकविरुद्ध बाल अदालतमा मुद्दा दायर भएको छ । जिल्ला अदालतमा मुद्दा दर्ता भएकामध्ये ११ जनालाई आपराधिक उपद्रवअन्तर्गत र अन्यलाई व्यक्ति विशेष मुद्दा दर्ता गरिएको हो । उनीहरूको बयान अदालतमा चलिरहेको छ ।
