कञ्चनरूप नगरपालिकाको ७९ करोड ८७ लाखको बजेट बिनियाेजित
सुमन राई
कञ्चनरूप, ३ भदौ । सप्तरीको कञ्चनरूप नगरपालिकाले चालू आर्थिक वर्ष २०८३/०८४ का लागि ७९ करोड ८७ लाख ६६ हजार ४ सय ५९ रुपैयाँको अनुमानित बजेट बिनियाेजित गरेको छ। बुधबार सम्पन्न नगरपालिकाको १३औँ नगरसभाले उक्त बजेट बिनियाेजन गरेको हो।
नगरप्रमुख ललनप्रसाद गुप्ताले प्रस्तुत गरेको बजेटमा चालूतर्फ तलब, भत्ता, कार्यक्रम खर्च तथा सशर्त अनुदानसहित ५१ करोड ८४ लाख ६६ हजार ६ सय ५१ रुपैयाँ ६८ पैसा अर्थात् कुल बजेटको ६४.९० प्रतिशत विनियोजन गरिएको छ। त्यस्तै, पुँजीगततर्फ २८ करोड २ लाख १९ हजार ८ सय ७ रुपैयाँ ४७ पैसा अर्थात् ३५.१० प्रतिशत बजेट छुट्याइएको छ।
बजेटमा आन्तरिक आयतर्फ ३ करोड १३ लाख ३ हजार ७ सय १० रुपैयाँ तथा आन्तरिक स्रोत तथा मर्मतसम्भार कोषतर्फ ६२ लाख २९ हजार ८ सय रुपैयाँ अनुमान गरिएको छ। सञ्चित कोषतर्फ १० करोड १ लाख ८६ हजार ९ सय ५८ रुपैयाँ ४७ पैसा आय हुने अनुमान गरिएको छ।
संघीय सरकारको राजस्व बाँडफाँडबाट १३ करोड २ लाख ७ हजार, प्रदेश सरकारको राजस्व बाँडफाँडबाट ७६ लाख ४८ हजार ९ सय ९० तथा संघीय वित्तीय समानीकरण अनुदानबाट १४ करोड ७५ लाख रुपैयाँ प्राप्त हुने अनुमान गरिएको छ। संघीय सशर्त चालूतर्फ ३१ करोड १५ लाख रुपैयाँ राखिएको छ।
यस्तै, संघीय सशर्त पुँजीगत ७६ लाख, समपूरक पुँजीगत ५२ लाख र विशेष अनुदान पुँजीगततर्फ २ करोड ६० लाख रुपैयाँ अनुमान गरिएको छ। प्रदेश वित्तीय समानीकरणबाट १ करोड ८९ लाख, विशेष अनुदान ३० लाख र समपूरक अनुदान २० लाख रुपैयाँ रहने जनाइएको छ।
नगरसभामा विनियोजन विधेयक, २०८३ सहित १५ वटा प्रस्तावमाथि छलफल गरी निर्णयसमेत प्रस्तुत गरिएको थियो।
